దేశ వ్యాప్తంగా సంచలనం సృష్టించిన దాద్రీ సంఘటనలో మృతుడు అఖ్లాఖ్‌(52) నివాసంలో లభించింది ఆవు మాంసం కాదని, అది మేక మాంసమని అధికారులు నిర్ధారించారు. అఖ్లాఖ్‌ ఆవు మాంసం తిన్నాడనే ఆగ్రహంతో ఒక గుంపు సెప్టెంబర్‌ 28న అతడిని హతమార్చిన విషయం విదితమే.ఈ సంఘటనపై తీవ్ర నిరసన వ్యక్తమైంది.ఆ మాంసాన్ని స్వాధీనం చేసుకున్న పశువైద్యశాఖాధికారులు దానిని పరీక్షల కోసం ఫోరెన్సిక్‌ ప్రయోగశాలకు పంపించారు.అక్కడ అది మాంసం కాదని, మేక మాంసమని నిర్ధారించారు. దీనిపై మృతుడి భారత వాయుసేన ఉద్యోగి సర్తాజ్‌ మాట్లాడుతూ రాజకీయ కారణాలతోనే తన తండ్రిని హత్య చేశారని ఆరోపించారు. 

నూతన పార్లమెంటు భవనాన్ని నిర్మించాలని లోక్‌సభ స్పీకరు సుమిత్రా మహజన్‌ ప్రతిపాదించారు. ప్రస్తుత పార్లమెంటు ఆవరణలో కానీ, లేదా రాజ్‌పథ్‌ మార్గానికి ఆనుకుని ఢిల్లీ పోలీసు భద్రతా కార్యాలయమున్న ప్రాంతంలోగానీ నిర్మించాలని పార్లమెంటరీ వ్యవహారాల మంత్రి వెంకయ్య నాయుడుకు రాసిన లేఖలో స్పీకర్‌ పేర్కొన్నారు. లక్నోలో నిర్వహించిన భారత్‌ శాసనసభాధిపతుల సమావేశంలో మాట్లాడుతూ 1927లో అప్పటి అవసరాలకు తగ్గట్టుగా నిర్మించిన 88 ఏళ్ల నాటి ఈ భవనం సభావ్యవహారాలకు ఇక ఎంతమాత్రమూ సరిపోదని తెలియజేశారు.

'కాంగ్రెస్ దర్శన్' ఇది కాంగ్రెస్‌ పార్టీకి చెందిన అధికార పత్రిక, హిందీలో ప్రచురితమయ్యే ఈ పత్రికలో వచ్చిన వ్యాసాలు ఇపుడు పార్టీలో ప్రకంపనలు పుట్టిస్తోంది. ఏకంగా భారతదేశ తొలి ప్రధాని జవహర్‌లాల్ నెహ్రూ, కాంగ్రెస్‌ అధ్యక్షురాలు సోనియా గాంధీని టార్గెట్‌ చేస్తూ రాసిన ఆర్టికల్స్ పార్టీలో కలకలం రేపింది. సోనియా గాంధీ ముఖచిత్రంతో వెలువడ్డ కాంగ్రెస్‌ దర్శన్ డిసెంబర్‌ సంచికలోని ఓ వ్యాసంలో ఆమె జీవితాన్ని ప్రస్తావించారు. సోనియా తండ్రి ఇటలీ ముస్సోలిని సేనానిగా పనిచేశారని, అతనో ఫాసిస్టని పేర్కొంది..