దేశంలో విద్యాలయాలపై ఆరెస్సెస్‌, బిజెపి ప్రభుత్వం జోక్యం వద్దని, విద్యా సంస్థలకు స్వతంత్ర ఇవ్వాలని డిమాండు చేస్తూ విద్యార్ధి లోకం పార్లమెంట్‌ మార్చ్‌ చేపట్టారు. దేశవ్యాప్తంగా వచ్చిన విద్యార్థి సంఘ నాయకులతో పార్లమెంట్‌ రోడ్డు కిక్కిసరిపోయింది. విద్యార్థుల చేపట్టే పార్లమెంట్‌ మార్చ్‌లో జెఎన్‌యు ప్రొఫెసర్ల సంఘం కూడా పాల్గొంది. దాదాపు రెండు వందల మంది జెఎన్‌యు ప్రొఫెసర్లు పార్లమెంట్‌ మార్చ్‌లో పాల్గొన్నారు

 గృహ కొనుగోలుదారుల ప్రయోజనాలను పరిరక్షించే ‘స్థిరాస్తి(నియంత్రణ, అభివృద్ధి) బిల్లు-2013’కు పార్లమెంటు ఆమోదం లభించింది. నిర్మాణ రంగంలో పారదర్శకతను తీసుకొచ్చే దిశగా ఈ బిల్లు ఈ నెల 10న రాజ్యసభ ఆమోదం పొందగా... తాజాగా లోక్‌సభ మంగళవారం ఆమోదముద్ర వేసింది. రాష్ట్రపతిఆమోదం అనంతరం బిల్లు చట్టరూపం దాల్చనుంది.

 రాయలసీమ సమస్యల పరిష్కారం కోసం వామపక్షాలు చేపట్టిన చలో అసెంబ్లీ ఆందోళన ఉద్రిక్తంగా మారింది. ముఖ్యమంత్రి చంద్రబాబుకు వ్యతిరేకంగా నినాదాలు చేస్తూ ఉమ్మడి రాజధాని హైదరాబాద్‌ నగరంలో వామపక్షాల కార్యకర్తలు కదంతొక్కారు. రాష్ట్ర విభజన సమయంలో రాయలసీమకు ఇచ్చిన హామీల్లో ఏ ఒక్కటీ అమలు కాకపోవడంతో ప్రజలు వివిధ రూపాల్లో ఆందోళనలు చేశారు. వామపక్షాల నేతృత్వంలో 15 రోజుల పాటు సీమ జిల్లాల్లోని వివిధ ప్రాంతాల్లో బస్సుయాత్ర సాగింది. వెనుకబడిన రాయలసీమకు ప్రత్యేక ప్యాకేజీ-సాగునీటి ప్రాజెక్టులు ఒక సంవత్సరంలో పూర్తి చేయాలి.. డిమాండ్లతో వామపక్షాలు చలో అసెంబ్లీకి పిలుపునిచ్చాయి.

శారద చిట్‌ ఫండ్‌ స్కాంపై వాస్తవాలు వెలువడినప్పటికి బిజెపి ఎందుకు మౌనం దాల్చిందని సిపిఎం ప్రధాన కార్యదర్శి, రాజ్యసభ పక్షనేత సీతారామ్‌ ఏచూరి ప్రశ్నించారు. రాజ్యసభలో ఈ అంశంపై చర్చల్లో బిజెపి నోరు మెదపలేదని దుయ్యబట్టారు. మంగళవారం పార్లమెంట్‌లో ఏర్పాటు చేసిన విలేకరుల సమావేశంలో ఏచూరి మాట్లాడారు. భారత దేశ రాజకీయ చరిత్రల్లో ఇంత వరకు ఇలా జరగలేదని, ఒకే కుంభకోణంలో లోక్‌సభ, రాజ్యసభ సభ్యులు, మేయర్లు భాగస్వామ్యం ఉందని ద్వజమెత్తారు. శారద చిట్‌ ఫండ్‌ కుంభకోణంలో వాస్తవాలు వెలుగు చూస్తున్నాయని, ఈ అంశంలో టిఎంసి, బిజెపి మిలాఖత్‌ అయినట్లు తెటతెల్లం అయ్యిందని దుయ్యబట్టారు.