ప్రముఖ రచయిత, హేతువాది ఎంఎం కల్బుర్గిపై హత్య జరిగి వంద రోజులు గడుస్తున్న కర్నాటక సిఐడి నిందితులను గుర్తించడంలో విఫలమైంది. దీంతో కర్నాటక ప్రభుత్వం కేసును సిబిఐకు అప్పగించాలని కర్నాటక ముఖ్యమంత్రి సిద్దరామయ్య కేంద్రాన్ని కోరారు.

రాయలసీమకు ఎలాంటి పరిస్థితుల్లో అన్యాయం జరగనివ్వబోమని ఏపీ సీపీఎం రాష్ట్ర కార్యదర్శి మధు పేర్కొన్నారు.రాయలసీమ అభివృద్ధి సమితి అధ్వర్యంలో తిరుపతిలో రాయలసీమ అభివృద్ధిపై నిర్వహించిన చర్చలో పాల్గొన్నారు..అలాంటి ప్రయత్నాలను తాము అడ్డుకుంటామని, రాయలసీమ హక్కుల కోసం పోరాటం చేస్తామని స్పష్టం చేశారు. రైతులకు నష్టపరిహారం ఇవ్వకుండా భూములను స్వాధీనం చేసుకొంటోందని, టిడిపి అధికార దుర్వినియోగానికి పాల్పడుతోందన్నారు.

రాష్ట్రాల ఆర్థిక అధికారాలపై తీవ్ర ప్రభావం చూపనున్న జిఎస్‌టి బిల్లు విషయంలో అఖిలపక్ష సమావేశం ఏర్పాటు చేయాలని, అన్ని రాష్ట్ర ప్రభుత్వాలతో కేంద్రం చర్చించాలని సీపీఎం ప్రధాన కార్యదర్శి సీతారాం ఏచూరి డిమాండ్‌ చేశారు.  రాష్ట్రాల సేల్స్‌టాక్స్‌ను కేంద్రం తమ గుప్పెట్లోకి తీసుకునే జిఎస్‌టి బిల్లు పార్లమెంటులో ఆమోదం పొందాలంటే రాజ్యాంగ సవరణ అవసరమన్నారు. దేశంలో 50 శాతం కంటే ఎక్కువ రాష్ట్రాల అసెంబ్లీలు ఆమోదం తెలపాల్సి ఉందన్నారు. అందుకే ఆయా రాష్ట్రాలతోనూ, అన్ని పార్టీలతోనూ కేంద్రం మాట్లాడాలని తాము కోరుతున్నామన్నారు.

చంద్రబాబుతో కెసిఆర్‌ భేటీ ముగిసింది. ఈ సమావేశం గంటన్నరపాటు కొనసాగింది. తిరిగి విజయవాడ నుండి కెసిఆర్‌ హైదరాబాద్ బయల్దేరారు. ఆయుత చండీ యాగానికి చంద్రబాబును ఆహ్వానించేందుకు కెసిఆర్‌ విజయవాడ చంద్రబాబు ఇంటికి వెళ్లిన సంగతి తెలిసిందే.

రాజమండ్రిలో సిపిఎం ఆంధ్రప్రదేశ్ రాష్ట్ర విస్తృత స్థాయి సమావేశాలు ప్రారంభం అయ్యాయి. ఈ సమావేశాలకు ముఖ్య అతిధులుగా సిపిఎం జాతీయ ప్రధాన కార్యదర్శి ఏచూరి, పొలిట్ బ్యూరో సభ్యులు రాఘవులు, రాష్ట్ర కార్యదర్శి పి. మధు హాజరయ్యారు. ముందుగా అమరవీరులకు నివాళులర్పించారు.పార్టీ పటిష్టత కోసం విస్తృతస్థాయి సమావేశంలో చర్చిస్తామని సీపీఎం ఏపీ రాష్ట్ర కార్యదర్శి మధు అన్నారు. ప్రజా సమస్యలు పరిష్కారం కావాలంటే ఉద్యమాలు ఉధృతం చేయాల్సిన అవసరముందన్నారు.