పెద్ద నోట్లను రద్దు చేయడం ద్వారా బ్లాక్‌ మనీ ఉన్నవారు ఎలాంటి ఇబ్బంది పడలేదని ఉండవల్లి అరుణ్‌కుమార్ అన్నారు. గతంలో రూ. 96 వేల కోట్ల మేర విదేశాలకు తరలిపోతే.. ఈ ఏడాది రూ. 2 లక్షల 76 వేల కోట్లు బయటకు పోయిందని ఆయన అన్నారు. మోదీ అనుభవరాహిత్యమే దీనంతటికీ కారణమని ఉండవల్లి విమర్శించారు.

టీవీ ఛానెళ్ల వార్షిక నవీకరణ నిబంధనలను సరళీకరించినట్టు కేంద్ర సమాచార, ప్రసార శాఖ మంత్రి ఎం.వెంకయ్య నాయుడు వెల్లడించారు. వారు నిర్ణీత గడువుకు 60 రోజుల ముందుగా వార్షిక అనుమతి రుసుము చెల్లిస్తే సరిపోతుందని చెప్పారు. దీనినే ఒక ఏడాది కాలపరిమితికి ప్రసారాల కొనసాగింపునకు అనుమతిగా పరిగణిస్తారన్నారు.

అవినీతికి సంబంధించిన కేసుల్లో దర్యాప్తును అడ్డుకోరాదని అత్యున్నత న్యాయస్థానం స్పష్టమైన తీర్పులిచ్చిందని ఎమ్మెల్యే ఆళ్ల రామకృష్ణారెడ్డి(ఆర్కే) తరఫు న్యాయవాది పొన్నవోలు సుధాకర్‌రెడ్డి ‘ఓటుకు కోట్లు’కేసులో హైకోర్టుకు నివేదించారు. అవినీతి కేసులో దర్యాప్తునకు ఆదేశించే అధికారం ఏసీబీ ప్రత్యేక కోర్టుకు ఉందని, దాని అధికారాలను హరించే హక్కు ఈ కోర్టుకు లేదని వివరించారు.

భారత ఆర్థిక వ్యవస్థలో తలుపులు మరింత బార్లా తెరవాల్సిన అవసరం ఉందని ఆర్థిక మంత్రి అరుణ్‌ జైట్లీ పేర్కొన్నారు. మరిన్ని పెట్టుబడులు ఆకర్షించడం కోసం, మౌలిక లోటును పూడ్చడం కోసం సంస్కరణలను మరో అడుగు ముందుకు వేయించనున్నట్లు ఆయన తెలిపారు. భారత్‌-బ్రిటన్‌ టెక్‌ సదస్సులో ఆయన మాట్లాడుతూ ‘ఆర్థిక వృద్ధి విస్తృతమయ్యే కొద్దీ రక్షణాత్మక విధానాలను అవలంబించే వాళ్లు కూడా తగ్గిపోతారన్నారు..

రూ.500,1000 నోట్ల రద్దుతో సామాన్యులు ఇబ్బందులు పడుతున్నారని కాంగ్రెస్ ఉపాధ్యక్షుడు రాహుల్ గాంధీ అన్నారు. సాధారణ ప్రజల పట్ల ప్రధాని మోదీది లెక్కలేనితనమని ఆయన విమర్శించారు. అకస్మాత్తుగా కేంద్ర ప్రభుత్వ నిర్ణయంతో రైతులు, చిన్న దుకాణదారులు, గృహిణులు అష్టకష్టాలు పడుతున్నారని రాహుల్ పేర్కొన్నారు.