దేశంలో సంచలనం రేపిన కోట్లాది రూపాయల బొగ్గు కుంభకోణంలో తొలి తీర్పు సోమవారం వెలువడింది. మోసం, నేరపూరిత కుట్రలకు గాను ఝార్ఖండ్‌ ఇస్పాత్‌ ప్రైవేట్‌ లిమిటెడ్‌ (జేఐపీఎల్‌) డైరెక్టర్లు ఆర్‌.సి. రుంగ్తా, ఆర్‌.ఎస్‌.రుంగ్తాలకు ప్రత్యేక న్యాయస్థానం నాలుగేళ్ల జైలుశిక్ష, జరిమానా విధించింది. నిజాయతీ, నైతికతల్లేని ఇలాంటి వ్యాపారుల వల్ల భారత్‌ అభివృద్ధిలో వెనుకబడిపోతోందని కోర్టు ఈ సందర్భంగా వ్యాఖ్యానించింది. రుంగ్తాలిద్దరికీ ప్రత్యేక సీబీఐ జడ్జి భరత్‌ పరాశర్‌ జైలుశిక్షతో పాటు రూ. 5 లక్షల వంతున జరిమానా విధించారు. జేఐపీఎల్‌ కంపెనీకి కూడా రూ. 25 లక్షల జరిమానా విధించారు.

గతంలో సిబిఐ కేసు నుంచి తప్పించుకొనేందుకే రాష్ట్ర గృహ నిర్మాణ సంస్థ ఛైర్మన్‌ వర్ల రామయ్య టిడిపిలో చేరారని ఎన్‌ఎస్‌యుఐ రాష్ట్ర అధ్యక్షులు రాజీవ్‌ రతన్‌ విమర్శించారు. విజయవాడలో ఆయన సిఐగా పనిచేస్తూ పాల్పడిన దందా అందరికీ తెలుసని, అలాంటి వ్యక్తి తమ నేత సి రామచంద్రయ్యపై ఆరోపణలు చేయడం సిగ్గు చేటన్నారు. 

మహాత్మాగాంధీ జాతీయ గ్రామీణ ఉపాధి హామీ పథకం (ఎంజిఎన్‌ఆర్‌ఇజిఎస్‌) కింద వేతనాన్ని రోజుకు రూ.180 నుంచి రూ.194కు పెంచుతూ పంచాయతీరాజ్‌, గ్రామీణాభివృద్ధిశాఖ ప్రత్యేక ప్రధాన కార్యదర్శి దినేష్‌కుమార్‌ సోమవారం ఉత్తర్వులు జారీ చేశారు. పెంచిన వేతనాలు ఈ నెల ఒకటో తేదీ నుంచే అమల్లోకి వస్తాయని ప్రభుత్వం పేర్కొంది.

‘భారత్‌ మాతాకీ జై’ నినాదంపై వివాదంలో యోగా గురు రామ్‌దేవ్‌ బాబా మరింత ఆజ్యం పోశారు. తమకు దేశ రాజ్యాంగంపై గౌరవముందని, లేదంటే ఆ నినాదాన్ని చేయననే లక్షల మంది తలలు నరికేసే వాళ్లమని ఘాటుగా వ్యాఖ్యానించారు. 

సోమవారం రాత్రి పెట్రోల్‌ డీజిల్‌ ధరలను పెంచుతున్నట్లు కేంద ప్రభుత్వం ప్రకటించింది. లీటర్‌ పెట్రో ల్‌పై రూ 2.19 పైసలు పెరగ్గా, లీటర్‌ డీజిల్‌ పై 98 పైసలు పెరిగింది. పెంచిన పెట్రోలు ధరలు అర్ధరాత్రి నుంచే అమలులోకి వచ్చాయి.