గోదావరి నదీ జలాల వివాద పరిష్కారం కోసం మహారాష్ట్రతో జరిపిన దౌత్యం మాదిరి భవిష్యత్తులో ఆంధ్రప్రదేశ్‌తోనూ ఇదేవిధంగా జల సమస్యలను అధిగమిస్తామని టీఆర్‌ఎస్‌ లోక్‌సభాపక్ష నేత జితేందర్‌రెడ్డి తెలిపారు. దేశమంతా నీటి కోసం యుద్ధాలు చేసుకుంటూ ఉంటే రాష్ట్ర ముఖ్యమంత్రి కేసీఆర్‌ ఒక నూతన దిశానిర్దేశం చేశారని చెప్పారు. గోదావరి నదిపై నిర్మించే ప్రాజెక్టులపై ఈ నెల 8న మహారాష్ట్రతో రాష్ట్ర ప్రభుత్వం ఒప్పందం చేసుకోనుందని వెల్లడించారు.

ఉద్యోగుల భవిష్యనిధి విత్‌డ్రాలపై పన్ను విధించాలని బడ్జెట్‌లో చేసిన ప్రతిపాదనకు సర్వత్రా విమర్శలు వెల్లువెత్తుతుండడంతో ఆర్ధిక మంత్రి అరుణ్‌ జైట్లీ బుధవారం దీనిపై స్పందిస్తూ, పార్లమెంట్‌లో బడ్జెట్‌పై చర్చకు తాను సమాధానమిచ్చేటపుడు తుది నిర్ణయం వెల్లడిస్తానని చెప్పారు.అన్ని వైపుల నుంచి తీవ్ర వ్యతిరేకత వ్యక్తమవుతున్న నేపథ్యంలో పాక్షికంగా వెనక్కి మళ్ళుతామని మంగళవారం ప్రభుత్వం సూచనప్రాయంగా తెలియ చేసింది. అధిక వేతన జీవులను ఉద్దే శించి ఈ చర్య తీసుకున్నామని, అంతే కానీ 3.7కోట్ల మంది గల ఇపిఎఫ్‌ సభ్యులనుద్దేశించి కాదని జైట్లీ చెప్పారు..

తనపై ఎన్ని కేసులు పెట్టిన బయపడేది లేదని, జెఎన్‌యు విద్యార్థి ఉద్యమ వారసత్వం తనకు అట్లాంటి ధైర్యాన్ని ఇచ్చిందని తీహార్‌ జైల్‌ నుంచి విడుదల అయిన జెఎన్‌యు ఎస్‌యు అధ్యక్షుడు కన్నయ్య కుమార్‌ పేర్కొన్నారు. ఆ రోజు(ఫిబ్రవరి 9)న జెఎన్‌యులో ఎవరూ దేశానికి వ్యతిరేకంగా నినాదాలు చేయలేదని, ఎబివిపి సహాయ కార్యదర్శి ముందుస్తు ప్రణాళికతోనే, జి న్యూస్‌ చానల్‌ను తీసుకొచ్చి తప్పుడు వీడియోలు సృష్టించారని ఆరోపించారు. జెఎన్‌యు డిఎన్‌ఎలోనే అట్లాంటి ఆలోచన లేదని కానీ బిజెపి ప్రభుత్వం జెఎన్‌యుపై కక్షకట్టి ఈ ఘాతుకానికి వడిగట్టిందన్నారు.

ప్రభుత్వ పథకాలన్నిటికీ ఆధార్‌ కార్డును అనుసంధానించడాన్ని చట్టబద్దం చేయడానికి లోక్‌సభలో కేంద్రం ఆధార్‌ బిల్లును గురువారం ప్రవేశపెట్టింది. పార్లమెంటరీ వ్యవహారాల మంత్రి ఎమ్‌.వెంకయ్యనాయుడు మాట్లాడుతూ ఈ బిల్లు ఆమోదం పొందితే రూ.20 వేల కోట్ల వృథాని అరికట్టొచ్చని చెప్పారు. గతంలో కాంగ్రెస్‌ కూడా ఎన్‌ఐడిఎఐ బిల్లుపేరుతో దీన్ని ప్రవేశపెట్టిందని కాంగ్రెస్‌ నాయకుడు మల్లిఖార్జున్‌ ఖర్గే అన్నారు. దీనకి జైట్లీ వివరనిస్తూ 'ఇది కాస్త భిన్నమైంది. ఇది స్వతహాగా ప్రభుత్వ చెల్లింపులకు మాత్రమే పరిమితమౌతుంది' అని చెప్పారు.