రాయలసీమ జిల్లాలకు అన్యాయం చేస్తే అసెంబ్లీని ముట్టడిస్తామని సిపిఎం రాష్ట్ర కార్యదర్శి పి.మధు హెచ్చరించారు. రాయలసీమ సమగ్రాభివృద్ధి కోరుతూ వామ పక్షాలు చేపట్టిన బస్సుయాత్ర సందర్బంగా మధు మాట్లాడుతూ, రాయలసీమలో ఏటేటా రైతు ఆత్మహత్యలు పెరుగు తున్నాయని ఆందోళన వ్యక్తం చేశారు. రాయలసీమ జిల్లాల్లో తాగు, సాగునీరు లేదని, భూగర్భ జలాలు అడుగంటాయని ఆందోళన వ్యక్తం చేశారు. ఈ ఏడాది రాష్ట్ర బడ్జెట్‌లో హంద్రీ నీవా, గాలేరు నగరికి తగినన్ని నిధులు కేటాయించాలని రాష్ట్ర ప్రభుత్వాన్ని డిమాండ్‌ చేశారు.

కేంద్ర ప్రభుత్వ మంత్రిత్వశాఖల్లో 6 లక్షలకు పైగా ఉద్యోగాలు ఖాళీగా ఉన్నాయని రాజ్యసభకు ప్రభుత్వం తెలిపింది. ఖాళీగా ఉన్న 6,02,325 ఉద్యోగాల్లో 5,33,081 గ్రూప్‌ ‘సీ’కి చెందినవని సిబ్బంది, ప్రజాసంబంధాలు, పింఛన్‌ వ్యవహారాల శాఖ సహాయ మంత్రి జితేంద్ర సింగ్‌ లిఖితపూర్వక సమాధానంగా తెలిపారు. 51,478 గ్రూప్‌ ‘బీ’, 17,766 ఉద్యోగాలు గ్రూప్‌ ‘ఏ’ అధికారుల స్థాయికి చెందినవని పేర్కొన్నారు.

కేంద్ర మంత్రి స్మృతి ఇరానీకి వ్యతిరేకంగా ఎంపీ సీతారాం ఏచూరి సభా హక్కుల నోటీస్‌ ఇచ్చారు. ఈ మేరకు ఆయన గురువారం రాజ్యసభ చైర్మన్‌ హమీద్‌ అన్సారీకి ఒక లేఖ రాశారు. గత నెల 24న రాజ్యసభలో కేంద్ర మంత్రి స్మృతి ఇరానీ తన హక్కులకు భంగం కలిగించే విధంగా మాట్లాడారని ఏచూరి తెలిపారు. తాను హిందూ దేవత దుర్గా మాతకు వ్యతిరేకంగా వ్యాఖ్యలు చేశానంటూ ఆధారంలేని ఆరోపణలు చేశారని వివరించారు. కేంద్ర మంత్రే స్వయంగా అలా మాట్లాడిన తరువాత తన అంతు చూస్తామంటూ కొంత మంది దుండగులు లెక్కలేనన్ని ఫోన్‌ కాల్స్‌ చేస్తున్నారని, అసభ్య పదజాలంతో తనను దూషిస్తున్నారని పేర్కొన్నారు.

ఆంధ్రప్రదేశ్ రాష్ట్రంలో విద్యుత్ ఛార్జీలు పెంచడానికి ప్రభుత్వం చేస్తున్న ప్రయత్నాలను సీపీఎం తప్పుబట్టింది. ప్రజలపై భారాలు మోపడం సరికాదని పేర్కొంది. ఈ ఛార్జీల పెంపును సీపీఎం, ప్రజా సంఘాలు వ్యతిరేకిస్తున్నాయి. ఈ నేపథ్యంలో ఈపీడీసీఎల్ కార్యాలయం వద్ద సీపీఎం ధర్నా చేపట్టింది. ప్రజలపై భారాలు మోపడం దుర్మార్గమని, పెద్ద పెద్ద కంపెనీలపై పన్నులు వేసి డబ్బులు వసూలు చేస్తే ఛార్జీలు పెంచాల్సినవసరం లేదన్నారు. నాలుగు శాతం అనేది చాలా ఎక్కువని, ఛార్జీలు పెరగడం వల్ల ప్రతి వస్తువు ధర కూడా పెరుగుతుందని తెలిపారు. రాష్ట్ర విభజన అనంతరం ఏపీకి మిగులు విద్యుత్ ఉండడమే కాకుండా 24గంటల విద్యుత్ సరఫరా చేయవచ్చన్నారు.