ప్రైవేటు యూనివర్సిటీలు ( ఎస్టాబ్లిష్‌మెంట్‌ రెగ్యులేషన్‌ ) బిల్లు - 2015ను గెజిట్‌లో ప్రచురణ నిమిత్తం ప్రభుత్వం జీవో నెం.3 ను సోమవారం విడుదల చేసింది. రాష్ట్ర ప్రభుత్వం డిసెంబర్‌ 22న శాసన సభలో ప్రైవేటు యూనివర్సిటీ బిల్లు - 2015 ప్రవేశపెట్టింది. గ్రీన్‌ఫీల్డ్‌ ప్రైవేటు యూనివర్సిటీల ద్వారా ప్రపంచ స్థాయి విద్యా విధానం అందించే ఉద్దేశంతో తీసుకువచ్చిన ఈ బిల్లుకు గవర్నర్‌ ఈఎల్‌ నరసింహన్‌ ఈ నెల 8న ఆమోదం తెలిపారు. దీంతో బిల్లును గెజిట్‌లో ప్రచురించేందుకు గాను న్యాయశాఖ సోమవారం జీవో నెం.3ను విడుదల చేసింది. 

క్రమబద్ధీకరణ ముసుగులో రాజధాని అమరావతి ప్రాంతంలోని వేలాది ఎకరాల అసైన్డ్‌ భూముల క్రయ విక్రయాలు యథేచ్ఛగా సాగిపోతున్నాయని సిపిఐ రాష్ట్ర కార్యదర్శి కె రామకృష్ణ విమర్శించారు.అనేక మంది పెద్దలు వేలాది ఎకరాల అసైన్డు భూములను కొనుగోలు చేస్తున్నారని, ప్రమాదకరమైన ఈ కుంభకోణం త్వరలో వెలుగులోకి వస్తుందని రామకృష్ణ తెలిపారు. అసైన్డ్‌ భూముల చట్ట ప్రకారం ఎవరికైనా ఒకసారి భూమిని ప్రభుత్వం ఇస్తే దాన్ని వారు అమ్మటంగానీ, వేరెవరైనా కొనటంగానీ చేయకూడదన్నారు. అందుకు భిన్నంగా క్రయ విక్రయాలైన భూములను క్రమబద్ధీకరించేందుకు ప్రభుత్వం యత్నించటం శోచనీయమన్నారు.

స్వచ్ఛ హైదరాబాద్‌-స్వచ్ఛ రాజకీయాలు 'క్లీన్‌ హైదరాబాద్‌-క్లీన్‌ పాలిటిక్స్‌' అనే నినాదంతో జీహెచ్‌ఎమ్‌సీ ఎన్నికల్లో సీపీఎం, సీపీఐ, ఎంసీపీఐ(యు), లోక్‌సత్తా, ఎంబీసీ జాక్‌, కాలనీ సొసైటీలు ఒక కూటమిగా ఏర్పడి పోటీ చేస్తున్నాయని సీపీఎం రాష్ట్ర కార్యదర్శివర్గ సభ్యుడు డీజీ నర్సింగరావు తెలిపారు. జీహెచ్‌ఎమ్‌సీ పరిధిలో 150 డివిజన్లు ఉండగా, ఇప్పటికే 60 స్థానాల్లో ఏ పార్టీ ఎక్కడ పోటీ చేయాలనే అంశంపై చర్చించి, నిర్ణయం తీసుకున్నామని చెప్పారు. ఈ 60 డివిజన్లలో లోక్‌సత్తా 21, సీపీఎం 26, సీపీఐ 12, ఎంసీపీఐ (యు) ఒక స్థానంలో పోటీ చేసేందుకు నిర్ణయించామని తెలిపారు.