కేంద్ర మంత్రి వెంకయ్యనాయుడు గురువారం ఇక్కడ విడుదల జేసిన పుస్తకం 'నిజం తెలుసుకోండి' (నో ది ట్రూత్‌)లో కొత్తదనమేమీ లేదని సిపిఎం ప్రధాన కార్యదర్శి సీతారామ్‌ ఏచూరి చెప్పారు. లెఫ్ట్‌పై బిజెపి గతంలో చేసిన ఆరోపణలను ఇందులో మరోసారి ప్రస్తావించారని ఏచూరి ఒక ప్రకటనలో పేర్కొన్నారు. దేశంలో మేధావుల ఆలోచనలను లెఫ్ట్‌ తప్పుదోవ పట్టిస్తోందని అందులో విమర్శించారని, వామపక్ష మేధావుల ఆలోచనా ధోరణి పరిశీలనాత్మకంగానే వుం టుందని, ఇకపై కూడా అదే విధంగా కొనసాగుతుందని ఏచూరి స్పష్టం చేశారు. వారి మేధోసంపత్తి, హేతు వాదం, చరిత్ర అధ్యయనం వంటివి ఇందుకు ప్రధాన కారణాలని ఆయన వివరించారు.

కేరళ రాష్ట్ర స్థానిక సంస్థల ఎన్నికల్లో ఎల్‌డిఎఫ్‌కు విజయం కట్టబెట్టిన కేరళ ప్రజలను సిపిఎం అభినందించింది. ఈ ఎన్నికల తీర్పుతో, యుడిఎఫ్‌ ప్రభుత్వం అనుసరిస్తున్న ప్రజా వ్యతిరేక రికార్డును, అవినీతిని ప్రజలు తిరస్కరించినట్లైందని సిపిఎం పొలిట్‌బ్యూరో పేర్కొంది. ఈ మేరకు ఒక ప్రకటన జారీ చేసింది. అలాగే బిజెపి మతోన్మాద రాజకీయాలను కూడా ప్రజలు తోసిపుచ్చారని, కుల ప్రాతిపదిక సంఘాల నాయకులను కూడగట్టేందుకు చేస్తున్న ప్రయత్నాలను కూడా ప్రజలు నిర్ద్వం ద్వంగా తోసిపుచ్చారని ఈ తీర్పుతో వెల్లడైందని పేర్కొంది.

 పెరిగిన నిత్యావసర సరకుల ధరలను అరికట్టాలనే డిమాండ్‌తో 9న రాష్ట్ర వ్యాప్తంగా అన్ని జిల్లా, డివిజన్‌, మండల కేంద్రాల్లో నిరసన ప్రదర్శనలు, ధర్నాలు నిర్వహించాలని 9 వామపక్ష పార్టీలు పిలుపునిచ్చాయి. 

రాజధాని రైతులకు ప్లాట్ల కేటాయింపు విషయంలో ప్రభుత్వ మరోసారి మాట తప్పింది. వేర్వేరు రెవెన్యూ గ్రామాల్లో పొలాలున్న రైతులకు కోరిన రెవెన్యూలో ఒకేచోట స్థలం కేటాయిస్తామని చెప్పిన ప్రభుత్వం అటువంటిదేమీ లేదని ప్రకటించింది. కుటుంబంలో ఒకే గ్రామ పరిధిలో వేర్వేరు పేర్ల మీద ప్లాట్లు ఇచ్చిన యజమానులు ఒకే చోట భూములు కావాలనుకుంటే ఈనెల 15వ తేదీలోపు దరఖాస్తులు చేసుకోవాలని సూచించింది. జనవరి రెండోతేదీన నేలపాడులో పూలింగు ప్రక్రియ ప్రారంభించారు. అప్పట్లో వేర్వేరు రెవెన్యూ గ్రామాల్లో భూములున్న రైతులు తమకు ఒకేచోట భూములు కావాలని కోరారు. దీనికి మంత్రులు అంగీకరించారు.