కేఆర్‌ఎంబీ ఏర్పాటవగానే అమల్లో ఉన్న ట్రిబ్యునల్ అవార్డు ప్రకారం ఆయా ప్రాజెక్టులను బోర్డు పరిధిలోకి తేవాలని ఏపీ నీటిపారుదల మంత్రి దేవినేని ఉమ అన్నారు. తెలంగాణ తెలిసీ తెలియక మొండి, తొండి వాదన, పిడివాదం చేస్తోందని ఆరోపించారు.

వస్తు సేవల పన్ను (జీఎస్‌టీ)పై తమకున్న అభ్యంతరాలను జయలలిత ప్రధానమంత్రి నరేంద్రమోదీకి తెలియజేశారు. పరిహారం చెల్లించే కాలవ్యవధి, పన్ను పరిధిలో ఉండని వస్తువులు తదితర అంశాలపై విస్తృత ఏకాభిప్రాయం కోసం కేంద్రప్రభుత్వం కృషి చేయాలని సూచించారు. తమిళనాడు వంటి తయారీరంగ, ఎగుమతి ఆధారిత రాష్ట్రాలకు జీఎస్‌టీ వల్ల ఆదాయంలో పెద్దఎత్తున నష్టం వాటిల్లే అవకాశం ఉందని జయ పేర్కొన్నారు.

స్టేట్‌ బ్యాంక్‌ ఆఫ్‌ ఇండియా (ఎస్‌బీఐ)లో స్టేట్‌ బ్యాంక్‌ ఆఫ్‌ హైదరాబాద్‌ (ఎస్‌బీహెచ్‌)ను విలీనం చేసే ప్రక్రియను తక్షణమే ఆపాలని కేంద్ర, రాష్ట్ర ప్రభుత్వాలను సీపీఐ(ఎం) రాష్ట్ర కమిటీ డిమాండ్‌ చేసింది. ఈ మేరకు సీపీఐ(ఎం) రాష్ట్ర కార్యదర్శి తమ్మినేని వీరభద్రం మంగళవారం ఓ ప్రకటన విడుదల చేశారు. ఎస్‌బీఐ అనుబంధ బ్యాంకులన్నింటిలో అగ్రగామిగా నిలిచి రాష్ట్రంలో రూ.2.50 లక్షల కోట్ల టర్నోవర్‌ కలిగిన ఎస్‌బీహెచ్‌ను విలీనం కాకుండా రక్షించుకోవడం చారిత్రక అవసరమని తెలిపారు. 

కూరగాయల ధరలు ఒకేసారి రెండంకెల స్థాయిలో పెరగడంతో మే మాసంలో టోకు ధరల ద్రవ్యోల్బణం 0.79శాతం పెరిగింది. దీంతో సరఫరా విభాగంలో ఎదురయ్యే ఇబ్బందులను అధిగమించ డానికి విధానపరమైన చర్యలను పారిశ్రామిక రంగం చేపట్టాల్సి వస్తోంది. అటు టోకు, ఇటు రిటైల్‌ ద్రవ్యోల్బణం పెరగడంతో పారిశ్రామిక ఉత్పత్తి మందగించినప్పటికీ భారత రిజర్వ్‌ బ్యాంక్‌ వడ్డీ రేట్లలో కోత విధించడంలో జాప్యం చేయవచ్చునని భావిస్తున్నారు.

వస్తువులు, సేవల అమ్మకంతో పాటు ఆన్‌లైన్‌లో జరిపే కొనుగోళ్లు అన్నింటికీ జీఎస్‌టీ అమలవుతుందని, లావాదేవీ తొలి అంకం (మూలం వద్దే) ఈ పన్ను విధించాలని నమూనా జీఎస్‌టీ చట్టంలో ప్రతిపాదించారు. కోల్‌కతాలో జరిగిన రాష్ట్రాల ఆర్థిక మంత్రుల సాధికార కమిటీ సమావేశంలో ఈ నమూనా చట్టానికి ఆమోదం తెలిపారు. వార్షిక టర్నోవర్‌ రూ.10 లక్షలు దాటిన సంస్థలకు జీఎస్‌టీ అమలవుతుంది. అదే సిక్కిం సహా ఈశాన్య రాష్ట్రాల్లో అయితే రూ.5 లక్షల టర్నోవర్‌కే విధిస్తారు. ఈ నమూనా జీఎస్‌టీ చట్టాన్ని రాష్ట్రాలు సమావేశం ఆమోదించినట్లు రెవెన్యూ కార్యదర్శి హస్ముఖ్‌ అధియా వెల్లడించారు