ఆంధ్రప్రదేశ్‌లో 20వేల ప్రభుత్వ ఉద్యోగాల భర్తీకి సంబంధించి వయో పరిమితి సడలింపు అంశాన్ని పరిశీలించి త్వరలో నిర్ణయం తీసుకుంటామని రాష్ట్ర ఆర్థిక మంత్రి యనమల రామకృష్ణుడు చెప్పారు. ప్రభుత్వ చీఫ్‌ విప్‌ కాలువ శ్రీనివాసులు ఈ ఉద్యోగాల భర్తీలో నిరుద్యోగుల వయో పరిమితిని 45 ఏళ్ల వరకు సడలించాలని విన్నవించారు. 

జగన్‌ ఆస్తుల కేసు విషయంలో ఇప్పటి వరకు సీబిఐ ఇచ్చిన ఆధారాలతో ఈడీ దర్యాప్తు చేస్తోంది. అందులో భాగంగా రాంకీ ఫార్మాపై విచారిస్తోన్న ఈడీ జగతి పబ్లికేషన్‌లో రాంకీ పెట్టిన పెట్టుబడులపై ఛార్జిషీటు దాఖలు చేసింది. ఈ సంస్థ దాదాపు రూ. 10 కోట్లను జగతి పబ్లికేషన్‌లో పెట్టుబడి పెట్టింది. దీనిద్వారా రూ. 144 కోట్ల లబ్ధి పొందినట్లు ఈడీ ఆరోపణలు చేస్తోంది. దీంతో రాంకీ ఫార్మాకు చెందిన 346 కోట్ల ఆస్తులను ఈడీ జప్తు చేసింది. 

నకిలీ మద్యం తయారు చేసినా.. అమ్మినా మరణశిక్షను విధించడానికి ఉద్దేశించిన బిల్లును బిహార్‌ శాసనసభ బుధవారం ఏకగ్రీవంగా ఆమోదించింది. శాసనసభ్యులు మద్యాన్ని సేవించకూడదనే తీర్మానాన్ని కూడా ఉభయ సభల్లోని సభ్యులు ఏకగ్రీవంగా అంగీకరించారు. శాసనాలు చేస్తున్న ప్రజాప్రతినిధులే ముందుగా మద్యానికి దూరంగా ఉండి.. ప్రజలను కూడా ఆ వైపు నడిపించాలని బిహార్‌ ఎక్సైజ్‌(సవరణ) బిల్లు ప్రవేశపెట్టే సందర్భంగా ముఖ్యమంత్రి నితీష్‌ కుమార్‌ పేర్కొన్నారు. 

దేశం వ్యాప్తంగా ఏళ్ల తరబడి పేరుకుపోయిన కార్మిక సమస్యల పరిష్కారికై సెప్టెంబర్‌ 2 జాతీయ సమ్మెతో కార్మిక శక్తిని చాటాలని 11 కేంద్ర కార్మిక సంఘాల జాతీయ సదస్సు పిలుపునిచ్చింది. గతంలో కేంద్ర ప్రభుత్వానికి నివేదించిన 12 డిమాండ్లతో పాటు, ఇటీవల కేంద్ర ప్రభుత్వం తీసుకున్న ప్రభుత్వ సంస్థల్లో పెట్టుబడుల ఉపసంహరణ నిర్ణయాన్ని తీవ్రంగా వ్యతిరేకిస్తున్నట్లు సదస్సు పేర్కొంది. మొత్తం 13 డిమాండ్ల పరిష్కారం కోసం కార్మిక సమ్మె చేయాలని సదస్సు నిర్ణయించింది.

 అసెంబ్లీ ఎన్నికల ప్రచార సందర్భంగా రెండు రోజుల క్రితం తొలిసారిగా బెంగాల్‌ వెళ్లిన ప్రధాని నరేంద్రమోడి అక్కడి అధికారపక్షాన్ని (తృణమూల్‌)ను మాటమాత్రం అనకుండా వామపక్ష కూటమిపై దాడి ఎక్కుపెట్టారు.ఈ విషయం బెంగాల్‌లో చర్చనీయాంశంగా మారడంతో  పశ్చిమ బెంగాల్‌ ముఖ్యమంత్రి మమతా బెనర్జీకి ధైర్యముంటే నారదా స్టింగ్‌ ఆపరేషన్‌లో లంచాలు తీసుకుంటూ పట్టుబడిన తృణమూల ఎమ్మెల్యేలను పార్టీ నుంచి బహిష్కరించాలని బిజెపి అధ్యక్షులు అమిత్‌షా మంగళవారం సవాల్‌ విసిరారు. మమత అధికారంలోకి వచ్చిన తరువాత బాంబుల మోత తప్ప సంగీతం వినిపించడం లేదని ఆయన అన్నారు.