ఏజెన్సీ ఏరియాలో పెసా చట్టం నిబంధనలను తప్పనిసరిగా అమలు చేయాలి. మద్యం దుకాణాలు స్థానిక ఆదివాసీలకు కేటాయించాలని కోరుతూ...

(ప్రచురణార్థం: సిపిఐ(యం) రాష్ట్ర కార్యదర్శి వి.శ్రీనివాసరావు
ముఖ్యమంత్రికి వ్రాసిన లేఖను ప్రచురణార్ధం పంపుతున్నాం. -జె.జయరాం, ఆఫీసు
కార్యదర్శి)

భారత కమ్యూనిస్టు పార్టీ (మార్క్సిస్టు)
ఆంధ్ర ప్రదేశ్ కమిటీ

విజయవాడ,
తేది : 18 అక్టోబర్‌, 2024.
శ్రీయుత నారా చంద్రబాబునాయుడు గారికి,
గౌరవ ముఖ్యమంత్రి,                                                         
ఆంధ్రప్రదేశ్‌ ప్రభుత్వం,
అమరావతి.
                విషయం:  ఏజెన్సీ ఏరియాలో పెసా చట్టం నిబంధనలను తప్పనిసరిగా అమలు చేయాలి.
మద్యం దుకాణాలు స్థానిక ఆదివాసీలకు కేటాయించాలని కోరుతూ...
అయ్యా,
        ఆంధ్రప్రదేశ్‌ ప్రభుత్వం మద్యం దుకాణాల టెండర్‌ నోటిఫికేషన్‌ 2024 నుండి
2026 వరకు (రెండు సంవత్సరాలు) మద్యం దుకాణాలు నిర్వహించుటకు జి.ఓ ఎంఎస్‌
నెం.372 ను తేది.30`9`2024న  డైరెక్టర్‌ ప్రొబిహిషన్‌ మరియు ఎక్సైజ్‌ శాఖ
వారు  ఉత్తర్వులు జారీచేశారు. రాష్ట్ర ప్రభుత్వం మద్యం దుకాణాలు లబ్ధిదారుల
ఎంపిక మరియు దుకాణాల ఏర్పాటుపై ప్రభుత్వ నోటిఫికేషన్‌ ను అనుసరించి
గిరిజనేతరులు, స్థానికేతర గిరిజనులు ధరఖాస్తులు చేసుకున్నారు. గిరిజనేతరులు
సిండికేట్లుగా ఏర్పడి తెలంగాణ రాష్ట్రం మరియు సరిహద్దు జిల్లాల నుండి
షాపులు దక్కించుకున్నారు. అల్లూరి సీతారామరాజు జిల్లాలో 40 దుకాణాలకు గాను
సుమారు 2200 ధరఖాస్తులు ఆశావాహులు చేసుకున్నారు. దుకాణ లబ్ధిదారుల ఎంపిక
విషయంలో పెసా చట్టం నిబంధనలను ఉల్లంఘించారు. ఏజెన్సీ చట్టాలను ప్రభుత్వం
గౌరవించలేదు.
        ఏజెన్సీ ప్రాంతంలో పెసా గ్రామసభకు లోబడి మద్యం దుకాణాలు నిర్వహించాలని
ఏ.పి.పెసా రూల్స్‌ 2011 రూల్‌ నెం.4,8-(1) క్లాజ్‌ -3 (2) సెక్షన్‌లో
పేర్కొన్నారు. 1996 పెసా చట్టం సెక్షన్‌ 4 (ఎ) (బి) (డి) (ఇ) (ఎం-1) చట్టం
ప్రకారం ఏజెన్సీ గ్రామాల్లో ఆదివాసీల ఆచారం, సంస్కృతి, సాంప్రదాయాలు,
సామాజిక న్యాయం మరియు మతపరమైన పద్దతులు, సామాజిక వనరులు నిర్వహణ, పరిరక్షణ,
సాంప్రదాయ పద్దతులలో వివాదాలు పరిష్కరించుకోవడానికి పెసా చట్టం ప్రకారం,
అధికారాలను అమలు చేసుకోవడంతో పాటు లబ్ధిదారులను ఎంపిక చేయు అధికారం, మద్యం
దుకాణాలకు అనుమతులు ఇవ్వడం, రద్దుచేయడం అంతిమ అధికారాలు పెసా గ్రామసభకు
మాత్రమే కలిగివున్నది. ఇట్టి విషయంలో పెసా గ్రామసభ ఆమోదం, తీర్మానం అత్యంత
కీలకమైనది. అందువల్ల చట్టవిరుద్దంగా ఏజెన్సీ ఏరియాలో అమలు చేస్తున్న మద్యం
షాపులు వేలం  రద్దు చేయాలని కోరుతున్నాను.
        పెసా గ్రామసభకు మద్యం దుకాణాలు వినియోగం, అనుమతి విషయంలో సెక్షన్‌ 3
క్లాజ్‌ -1, సెక్షన్‌ 8 క్లాజ్‌ -1 ప్రకారం ప్రత్యేకమైనది, అంతిమమైనది.
కావున పెసా చట్టం సెక్షన్‌ 4 క్లాజ్‌ - డి, ఎన్‌ ప్రకారం గ్రామసభకు
శాసనపరమైన స్వయంపాలన అధికారం కలిగివున్నది. ఏజెన్సీ పరిధిల్లో సెక్షన్‌ 8
క్లాజ్‌ -11 ప్రకారం మద్యం దుకాణాల లైసెన్స్‌ను స్థానిక గ్రామసభ
పరిధిల్లోనే స్థానిక గిరిజనులకు మాత్రమే మంజూరు చేయాలని, సెక్షన్‌ 3
క్లాజ్‌ -11 ను అనుసరించి ఏజెన్సీ గ్రామ ఆచారాలు, సంస్కృతి, సాంప్రదాయాలు,
కట్టుబాట్లు ప్రకారం మద్యం దుకాణాల కోసం వచ్చిన ధరఖాస్తులను పరిశీలనచేసి
గ్రామసభ పరిధిలోనే లబ్ధిదారులను ఎంపిక చేయాలి. అర్హత కలిగిన
ధరఖాస్తుదారులను గ్రామసభకు తెలియపర్చడంతో పాటు మద్యం దుకాణాల విషయంలో
గిరిజనులకు లైసెన్స్‌ గ్రామసభ పరిధిల్లోనే ఎంపిక చేయాలని జిల్లా
కలెక్టర్‌కు తగిన ఆదేశాలు జారీచేయాలని కోరుతున్నాం. ఏజెన్సీ మద్యం దుకాణాలు
ఏర్పాటు చేయాలా? వద్దా ? అనే అంశాన్ని పెసా గ్రామసభ సమక్షంలో చేతులు ఎత్తటం
ద్వారా మెజార్టీ ఓటింగ్‌ ద్వారా తగిన చర్యలు తీసుకోవాలని విజ్ఞప్తి
చేస్తున్నాను.

అభివందనములతో...

(వి.శ్రీనివాసరావు)
రాష్ట్ర కార్యదర్శి

--
COMMUNIST PARTY OF INDIA (MARXIST)
            Andhra Pradesh Committee
H.No. 27-30-9,Akula vari Street,
Governorpet, Vijayawada - 520 002.
Phone: 0866-2577202;
Web: www.cpimap.org